​​
.دا غږ د عزتمن ژوند، ټولنیز عدالت، ملي یووالي، او دوامدار پرمختګ غږ دی

​

​الله تعالی افغان ولس ته د افغانستان په نوم یوه بډایه، ښکلی او ستراتیژیک ټاټوبی ور په برخه کړی دی. دا الهي امانت د ټولو افغانانو ګډ مسؤلیت دی. افغانان مکلف دي چې د مثبت، دوامدار او شعوري بدلون له لارې خپل هېواد د نړۍ له سیا ملتونو سره برابر کړي، څو هر افغان د خدای تعالی تر حاکمیت لاندې، د ورورولۍ، عدالت، متقابل درناوي او انساني کرامت په فضا کې ژوند وکړي او له فقر، محتاجۍ او بې‌ثباتۍ څخه ځانونه خلاص کړي

​​​

دا زموږ ملي مفکوره ده؛ مفکوره چې له خلکو راولاړه شوې، د خلکو لپاره ده، او د خلکو په ګډون عملي کېږي. په همدې اساس، د افغانستان هر وګړی، پرته له قومي، ژبني، مذهبي، سمتي او سیاسي توپیر، په فطري ډول د افغان ملت برخه ده

​

افغان ملت د تاریخ له درندو تجربو، جګړو او کړاوونو څخه ژور درسونه اخیستي دي. افغان ملت پرته له سولیزو او تفاهم ډکو هڅو، نور له هر ډول ناسمو پرېکړو، بهرنیو لوبو او کورنیو تفرقو، د قدرت د بې ځایه هوسونو کلک مخالف دی او نه غواړي چې د افغانستان څلوېښت میلیونه افغانان له ناامنۍ، بې‌عدالتۍ او بې‌وزلۍ سره مخ پاتې شي

​

افغان ملت ګوند د داسې افغانستان لپاره کار کوي چې په کې ټول وګړي ځان شریک، خوندي او باعزته احساس کړي؛ افغانستان چې د سولې، قانون، عدالت، علم، اقتصاد او ملي حاکمیت سمبول وي