سرلیک: د نجونو زده کړه؛ دملت او امت امانت او د افغانستان راتلونکی

د نوي ښوونیز کال په پیل سره، له بده مرغه یو ځل بیا زموږ د نجونو پر مخ د ښوونځیو دروازې تړلې پاتې شوې. دا یوازې د تعلیم بندېدل نه دي، بلکې د یوې ټولنې د راتلونکي، عزت او پرمختګ بندېدل دي. هغه امت چې د «اقْرَأْ» په امر پیل شوی، څنګه کولی شي د خپلو لوڼو له زده کړې څخه انکار وکړي؟

اسلام د علم دین دی. رسول الله ﷺ فرمایلي: «طلب العلم فریضة على كل مسلم» — د علم طلب پر هر مسلمان فرض دی. علماوو څرګنده کړې چې دا حکم د ښځې او سړي دواړو لپاره دی. زموږ تاریخ شاهد دی چې مسلمانې ښځې لکه حضرت عایشه رضی الله عنها، د علم، فقه او روایت سترې سرچینې وې نو څنګه نن زموږ لوڼې له دې حقه بې برخې شي؟

د نجونو د تعلیم بندېدل یوازې یو ټولنیز مشکل نه دی؛ دا د افغانستان پر راتلونکي ستر ګوزار دی. هغه هېواد چې خپلې لوڼې بې سواده پرېږدي، خپله نیمایي ټولنه فلج کوي. دا کار زموږ اقتصاد کمزوری کوي، زموږ کورنۍ زیانمنوي، او زموږ نړیوال حیثیت ته زیان رسوي. افغانستان، چې پخوا د علم او تمدن مرکز و، نن د جهل په تیارو کې ټېل وهل کېږي.

موږ دا هم درک کوو چې اوسنی نظام ځان د اسلام د حاکمیت دعوه کوي. خو دا باید په صداقت وپوښتل شي: ایا د نجونو له زده کړې څخه منع کول د اسلام حکم دی، که د تفسیر او سیاست تېروتنه؟ که موږ رښتیا د شریعت پلي کېدل غواړو، نو باید د عدالت، علم او رحمت اصول هم ورسره یو ځای پلي کړو.

افغان ملت ګوند له مسؤلو چارواکو، په ځانګړي ډول له اسلامي امارت څخه غوښتنه کوي چې دا پرېکړه له سره وڅېړي. د نجونو تعلیم نه یوازې یو انساني حق دی، بلکې یو اسلامي وجیبه او ملي اړتیا ده. زموږ لوڼې د دې وطن راتلونکی دي — که نن یې له زده کړې محروم کړو، سبا به ټول ملت د دې پرېکړې بیه پرې کوي.

راځئ چې د اسلام د رڼا په سیوري کې، د خپل وطن راتلونکی وژغورو. علم بندول، راتلونکی بندول دي.